Köşə
Köşədə Ahıska və ahıskalılar haqqında xatirələrinizi, maraqlı məlumatları və əhvalatları, fotoları və sairə bu kimi materialları bölüşə bilərsininz. Öz bədii yaradıcılığınızdan nümunələri də göndərə bilərsininz. Materialları yerləşdirmək üçün bu email ünvanına ötürə bilərsiniz: asif.hacili@mail.ru
                                                  
                 ******* 
 
-- Köşədə ilk olaraq 1988-1989-cu illərdə Asif Hacılının və Faiq Mamaxovun Bakıda təhsil alan tələbələrlə birgə Rus dili və ədəbiyyatı İnstitutunda yaratdıqları "Ümid" ansamblı haqqında 1989-cu ildə dərc olunmuş məqaləni veririk. Ahıskanı tanıtmaq üçün məqaləni rusca yazıb dərc etdirmişdik. O günlərdən artıq 18 il keçib... Ansamblın üzvləri öz xatirələrini bölüşə və ya sadəcə əlaqə saxlaya bilər. Köşə üçün yazılarınızı, istəklərinizi və rəyinizi gözləyirik. Buyurun, keçid edərək "Ümid" ansamblı ilə tanış olun.
Asif Hacılı

           
 «Умуд» – ансамбль советских турок

 
     -- Köşənin növbəti səhifəsində Ahıskanın tarixi şəxsiyyəti, keçən əsrin əvvəllərində milli mücadilənin öndər şəxsiyyəti, böyük ziyalı və sərkərdə Osman Sərvər Atabəylə bağlı Bəyin bağbanı olmuş Şahmurad kişinin xatirələrini veririk.
      Öncə qeyd edək ki, Posxov yaxınlığındakı Caksu qalasının adıyla 13-cü yüzildən tarixə düşmüş, 1267-ci ildə müstəqil Samshi bəyliyini (gürcü mənbələrində Saatabaqo, Samshi Saatabaqo, yəni Atabəylər yurdu, Samshi Atabəyliyi kimi tanınmışdır) yaratmış qıpçaq əsilli Axısqa Caksu atabəyləri sülaləsinin nəslindən Feyzulla bəyin oğlu olan Osman Sərvər bəy 1886-cı ilin 20 avqustunda Axısqada anadan olmuşdur. Osman Sərvər Bəyin anası Zeynəb xanım dövrünün görkəmli ziyalısı, şərq dilləri mütəxəssisi Feyzixan oğlu Hüseyn Əfəndinin qızıdır.
Axısqalı Ömər Faiq Əfəndidən ilahiyyat və türk dili dərsi almış Osman Sərvər bəy 1904-cü ildə Tiflisdə real gimnaziyanı bitirmiş, Peterburqda, Almaniyanın Saksoniya vilayətində və Breslav universitetlərində mühəndislik, kənd təsərrüfatı və hüquq təhsili almışdır. 1917-ci ildə vətənə dönən Osman Sərvər bəy bütün həyatını milli mücadiləyə, siyasi və hərbi fəaliyyətə həsr etmişdir. Milli təşkilatlar, könüllülərdən ibarət özünümüdafiə qüvvələri təşkil edən Osman bəy qədim atabəy nəslindən qalan şəxsi əmlakını, bütün var-dövlətini də xalq yolunda sərf etmişdir. Məhz Osman bəyin şücaəti, sərkərdəlik istedadı və təşkilatçılığı sayəsində Axısqa-İqdır bölgəsinin türk əhalisi rus, bolşevik, erməni qırğınlarından xilas olmuşdur. Geniş miqyaslı şəxsiyyət olan Osman bəy Bakı, xüsusən «Bakı İslam Xeyriyyə Cəmiyyəti», Milli Hökumət və Türkiyə rəsmiləri ilə əlaqələr yaratmışdır. Onun az saylı qüvvələrlə düşmənin nizami orduları və quldur dəstələri üzərində qələbələri də hərb sənətinin nailiyyətlərindən hesab oluna bilər. Axısqanı 1918-ci ilin aprelində erməni quldurlarından təmizləyən də Osman Sərvər Atabəy olmuşdur. Osman Sərvər bəy Axısqa-Axılkələk Müsəlmanları Milli Şurası yaratmış (Cənubi-qərbi Qafqaz əhalisinin haqlarını qoruma mərkəzi) və Şura 25 dekabr 1919-cu ildə Axısqanın muxtariyyətini elan etmişdir. Sonradan Türkiyənin ictimai-siyasi həyatında fəal iştirak etmiş, 1924-cü ildə Ərdəhandan millət vəkili seçilmiş, mədən işlərində, elm sahəsində çalışmış Osman Sərvər bəy 1962-ci ildə nəvəsi Feyzulla ilə birlikdə yol qəzasında həlak olur. Bu qəhrəman və zəki insanın adı Axısqa türkləri və ümumən türk dünyası tarixinə qızıl hərflərlə yazılmağa layiqdir.
Buyurun, keçid edərək xatirələrlə tanış olun.
Asif Hacılı
                         
Osman Sərvər Atabəy
                         
   

    -- Bir şairimiz var idi – Güləhməd Şahin... sənədlərdə Güləhməd Şərəf oğlu Kuçiyev... Əslən Ahıska mahalının Koblıyan (Altunqala) bölgəsinin (indiki Adıgün rayonunun) Pulate kəndindən. 1955-ci ildə Özbəkistanda anadan olmuş, 1959-cu ildə ailəsi ilə Azərbaycana köçmüş, Saatlı rayonunun Fətəlikəndində məskunlaşmışdı. 1971-ci ildə Fətəlikənd məktəbini bitirib təhsilini Bakıda davam etdirmiş, iqtisadçı ixtisasına yiyələnmişdi. Müxtəlif sahələrdə çalışmışdı, həm də şair idi, poemalar, şeirlər yazırdı. İki kitabı çap olunmuşdu. Xain xəstəlik onu qəfil yaxaladı, bu fani dünyanı tərk etdi, əbədiyyətə qovuşdu, bizə şeirləri qaldı, şeirlərdə səslənən duyğuları, düşüncələri, arzuları, yurd həsrəti qaldı... Ölümündən bir qədər əvvəl “Bəxtimə düşən ömür” kitabının əlyazmasını verib oxumağımı, fikir bildirməyimi istəmişdi. Oxuyub rəy yazmışdım, gözəl əsərlər yazdığını demişdim və rəyi də vermişdim Güləhmədə. İndi həmin rəyi bəzi əlavələrlə dəyərli oxucularımıza təqdim edirəm. Bir də Güləhmədin yadigar olaraq mənə ünvanladığı “Asif müəllim” şeirini və Saatlıda Adıgün kəndində ünlü alim Yunus Zeyrək və Güləhmədlə çəkdirdiyimiz şəkli. Əziz qardaşımız Yunus Zeyrək də bu gün xəstəliklə mücadilə aparır, yastığı yüngül olsun, Allah şəfasını versin... Güləhməd qardaşımızın ruhu şad olsun...
Asif Hacılı
                     

                      Bir şairimiz var idi – Güləhməd Şahin



VATAN BİLGİSİ
 
Facebook beğen
 
Reklam
 
 
Bugün 7433 ziyaretçi (26283 klik) kişi burdaydı!
=> Sen de ücretsiz bir internet sitesi kurmak ister misin? O zaman burayı tıkla! <=